كلمة وحشتينى

من طرف همسة ليل السبت يناير 19, 2008 9:20 pm

كلمة وحشتينى

ايه رأيكوا فى الكلمة ديه ..... أو يعنى ايه مفهومكوا للكلمة ديه؟
اللى انا ملاحظاه اليومين دول انها انتشرت بشكل غريب بين الولاد والبنات بصورة طبيعية و كأنها صباح الخير
اللى اعرفه ان الكلمة ديه معناها كبير اوى و انها ممكن توصل لمنزلة كلمة بحبك
بس محدش بيراعى ده دلوقتى خالص وممكن تلاقى الولاد بيقولوها للبنات بصورة أخوية
بس يا ترى الطرفين متأكدين ان كل واحد فيهم هيفهمها بنفس الصورة
اعتقد الموضوع بيختلف فى البنات عن الشباب
البنات
كلمة وحشتينى بالنسبة ليهم هى قمة الرومانسية..... كلمة كبيرة اوى...ميقولهاش الا شخص حاسس ان الانسانة اللى قدامه ديه انسانة مميزة بالنسبة ليه
و أطرف تعليق سمعته من بنت على الكلمة ديه قالتلى انها كلمة تسهرنى الليل
بس للأسف مفيش اللى يراعى كده
خلاص بقى كل الكلام سهل ومعظم كلام الحب فقد معناه
اما الشباب
فبما ان نسبة اللى بيقولوها منهم اعلى من البنات
نقدر نستنتج ان الكلمة بالنسبة ليهم عادية
وانا يمكن اتناقشت مع كتير منهم بخصوص الموضوع ده
وكان ردهم انهم بيقولوها زى اى كلمة عادية و أحيانا من باب المجاملة

يمكن عشان احنا فى زمن الاختلاط بقى خلاص كل الكلام عادى وبقى من السهل جدا ان البنت تفتح اى موضوع مع الولد او العكس مهما كانت حساسية الموضوع
بس لازم يكون لينا وقفة و حدود
يعنى مثلا دلوقتى لو واحد عايز يلمح لواحدة انه بيحبها, هيجيب كلام منين يلمح بيه
هيقولها ايه؟
هيقولها وحشتينى
ما هى بتسمعها كل يوم و من مليون واحد
والنتيجة
يا يقولها بحبك فى و شها و يستحمل الصدمة يا إما يستنى بقى لحد ما يخترعوا كلمة جديدة يلمح بيها
خلاصة الموضوع إن انا مش معقدة ولا حاجة بس دى ظاهرة كان لازم أقف عندها أو حاجة ضايقتنى و حبيت أشاركم فيها و أعرف ارائكم
يا ترى كلمة وحشتينى بالنسبة ليك او ليها كلمة عادية جدا و ممكن تمر عليك مرور الكرام كأنها صباح الخير
ولا كلمة بتقف عندها و ليها معنى مختلف عندك و متقدرش تقولها الا لانسان مميز و تكون مغلفة بالخجل